தம்மம்பட்டி சிவன் கோவிலில் கொள்ளை முயற்சி!
தம்மம்பட்டி சிவன் கோவிலில் கொள்ளை முயற்சி!
முகமூடி அணிந்து வந்த கொள்ளையர்களுக்கு போலீஸ் வலை!!
தம்மம்பட்டி, டிச.28- தம்மம்பட்டி சிவன் கோவிலின், வாயிற் கதவின் பூட்டை உடைத்து கொள்ளையடிக்க முயன்ற முகமூடி கொள்ளையர்கள் குறித்து போலீசார் தீவிர விசாரணை மேற்கொண்டுள்ளனர்.
சேலம் மாவட்டம், தம்மம்பட்டி பேருந்துநிலையம் பின்புறம், சுவேநதியையொட்டி, 700 ஆண்டுகள் பழைமையான காசிவிசுவநாதர் சிவன் கோவில் உள்ளது. இந்துசமய அறநிலையத்துறையின் கட்டுப்பாட்டில் உள்ள இக்கோவிலில், சில நாட்களாக சுற்றுச் சுவர் அமைக்கும் பணி நடைபெறுகிறது. அதற்காக தினமும் ஏராளமான தொழிலாளர்கள் கட்டுமானப்பணியில் ஈடுபட்டுள்ளனர்.
இந்நிலையில், நேற்று நள்ளிரவு முகமூடி அணிந்து வந்த இரண்டு நபர்கள், கோவிலின் முன்புறம் உள்ள இரண்டு சி.சி.டி.வி. கேமிராக்களின் ஒயர்களை துண்டித்துவிட்டு, வாயி்ற்கதவின் பூட்டை உடைத்து கோவிலுக்குள் நுழைந்தனர். உள்பிரகாரத்திற்குள் செல்லும் வாயிற்கதவு ஸ்டெயின்லெஸ் ஸ்டீலால் போடப்பட்டுள்ளதால், அதன் பூட்டை கடப்பாறை கம்பியால் உடைத்து அந்த கதவை திறக்க முயன்றுள்ளனர். அதை திறக்க முடியாததால், கோவில் வெளிப் பிரகாரத்தை கடப்பாறையுடன் சுற்றிவந்துள்ளனர். சாமி சிலைகள் இருக்கும் பிரகாரத்திற்குள் நுழைய முடியாததால், பின்னர் அங்கிருந்து தப்பி சென்றனர். முகமூடி கொள்ளையர்கள் கடப்பாரையுடன் கோவிலுக்குள் சுற்றிவரும் காட்சி, கோவிலுக்குள் உள்ள சி.சி.டி.வி. கேமிராவில் பதிவாகி உள்ளது.
இந்த சம்பவம் குறித்து, தம்மம்பட்டி சிவன் கோவில் திருப்பணிக்குழு தலைவரும், தி.மு.க. நகரசெயலாளருமான வி.பி.ஆர்.ராஜா மற்றும் பேரூராட்சி கவுன்சிலர்கள் ரமேஷ், நடராஜ், கலியவரதராஜி, பழனிமுத்து, திருச்செல்வன் உள்ளிட்டோர் அறநிலையத்துறை செயல்அலுவலர் மற்றும், தம்மம்பட்டி போலீசாருக்கு தகவல் அளித்தனர். அதன்பேரில், தம்மம்பட்டி காவல் ஆய்வாளர் முருகேசன் தலைமையிலான போலீசார், கோவில் சி.சி.டி.வி. கேமிரா காட்சிகளை வைத்து, கடந்த 10 நாட்களாக கோவிலுக்கு வந்து சென்றவர்கள், சி.சி.டி.வி கேமிராவில் பதிவானர்களின் உருவங்களுடன் ஒத்து போகிறதா என, தீவிர விசாரணை மேற்கொண்டுள்ளனர்.
கருத்துகள்
கருத்துரையிடுக